乾收銀 ....續

有好幾日冇寫乾收銀喇, 等我繼續講埋佢地嘅功用先:

3) 扮中立

呢招比較少用於商業機構, 最多邊個用? 咪係政府囉. 我地唔係成日聽倒政府d 官講咩咩顧問報告.. 係囉, 咪就係乾收銀囉. 01-02年政府就俾人質詢過點解用1.5億請顧問, 都唔益吓本地 d 大學嘅研究機構. 政府真係好鐘意用顧問呢家野. 無他, 因為運用公帑事關重大, 一不小心就俾人 charge 話浪費, 話有利益, 所以事無大小都懶中立咁揾個外人做個 study: 「拿... 人地講架咋.. 我都係根據顧問報告做架咋」 所以好多大中小 consulting firm 都會有 Government and Public Sector 呢個 practice. 佢地爭嘅唔只係政府嘅生意, 仲有幾百間政府資助嘅機構同埋無數嘅 NGO. 佢地勝在夠公平公開, 一定開 tender, 唔理你大中小公司都有機 bid 吓啦.

話時話.. 扮中立呢吓野唔係次次都管用架, 有時俾左錢, 點知個乾收銀唔生锈真係好鬼中立, 寫左個同你意思相反嘅 report, 咪捉蟲? 唔使驚喎, 有一招叫 "收埋佢".... 自己友 circulate 份 report 咪完事囉, 俾錢請乾收銀冇話一定要跟佢個report 嘅 findings 架喎. 乾收銀亦唔會理你用唔用, 收左錢就算架啦. 我地 d 公帑咪係咁浪費左囉... 活生生嘅例子: 個中環鐘樓報告囉! 依... 個報告叫咪鬼拆喎, 點同上頭交代呀.... 妖.... 收鬼埋佢唔好俾人睇囉 .....你估吓用左幾多錢?!

4) 抄人橋, 套人料

呢個係我覺得乾收銀最有用嘅地方. 拿, 你想知你嘅 competitors d 料, 或者想早 d 知道佢地有d 咩野新攪作, 就可以請個乾收銀, 叫佢做個 market study. (梗係唔好直接講係去索料啦, 係 market study), 講明有料到先俾足錢嘅... 個乾收銀係會用盡所有唔會俾人告嘅方法去套 d 料番嚟架喇. 有咪計? 等我老吹一兩招啦. 其中一個做法就係撘路識 d 中層人, 佢地通常 sense 冇咁強, 你約倒佢食飯的話點都攞倒 d insider information 嘅. 一係就扮有 job 俾 d 人interview, 响interview 度基本上你問咩佢都答咩架啦. (Disclaimer, 呢 d 全為本人個人意見, 不可當真, 雖未必犯法, 但好賤, 唔好當真用). 仲有一招就係懶係做個行業嘅 research, 同 d target 嘅公司講話一定唔會公開名架, 最係會幾間有 participate 嘅公司 share 番個 results...... blar blar blar......冇錯, 做 research 嘅內容係不記名嘅, 但係個乾收銀去做 interview collect data 嗰時有冇响有意無意間問多左少少野就你自己醒水喇.

講到呢度, 都差唔多喇, 再講一次, 當故仔聽好喇, 唔好當真呀, 不過如果你遇過d 好類似嘅經驗, 我睇係巧合啩!

我呢吹架啫, 要知多 d 堅料, 可以拜讀吓兩位真係做過乾收銀嘅人嘅書

Consulting Demon 呢位人兄响 BCG 做過吓, 佢 d 响日本嘅 experience 都幾過癮架

House of Lies: How Management Consultants Steal Your Watch and Then Tell You the Time

呢位人兄對乾收銀好鬼批判吓, 佢直頭講到乾收銀有害健康, 對家爺仔乸有莫大威脅咁. 佢自己Columbia Business School grad 左之後就做乾收銀, 做左一排發覺唔對路又或者良心發現, 出左嚟寫書同寫 column 咁.

夠薑

安南先生噚日做左一件好夠薑嘅事, 就係當眾勁寸人渣 Bush! 仲要係响人家地頭 (已故美國總統杜魯門位於密蘇里州的圖書館), 直接了當, 不留情面咁寸布殊, 佢嗰句: 「冇邊個凌駕於別個國家之上嘅國家能夠實現自身嘅安全」, 簡直係大快人心.

一向講野好保留嘅安南, 點解特然間咁夠薑呢? 之唔係因係佢老人家夠鐘起身返屋企喇, 又唔慌會再响國際政治舞台有d咩野攪作架啦, 使鬼俾面你條死白痴仔咩. 你咪米鬼交聯合國會費囉, 反正又唔關佢事, 其實d 死美國佬點都唔會俾錢架啦, 佢地仲爭人咁多錢, 年年赤字, 有鬼錢咩.

唉, 呢個世界上, 有幾多人可以好似安南咁, 終有一日可以暢所欲言呀. 一般打工仔, 對間公司或者d高層有咩野唔 Nike, 點可以出聲呀. 就算到走人果陣, 通常好會好嚟好去, 一句山水有相逢, 基本上即係對個人言論自由寫上句號.

近期有位打工仔就好薑呀, 偷影老細 d 衰野, 再去報串, 完全發揮出言論自由同埋內部監控嘅精髓. 點解佢咁勁? 食環處架, 唔會俾人炒架, 但係佢都係好有吉士 (或者怨氣啦), 因為一報完串就俾個老細調左去守水塘!!

唉, 今時今日, 打工仔仲邊有講出心底話嘅一日呀.

唔記得邊位人兄個 blog 曾經講過, 寫blog其中一個目的係講出一d平時唔敢講嘅野. 我覺得都幾啱. 我地實在收埋收埋太多唔可以講或者唔敢講嘅野. 死左帶埋落棺材好似有d 屈結.

近排都有另一批人可以夠薑, 講 d 小市民唔會講嘅野. 咪就係班大狀囉. 佢地好多都已經上左岸, 唔會驚得罪邊個而冇飯食. 當然佢地都有d risk 啦, 就係佢地d 仔仔女女可能會被清算. 但我地呢個和諧先進嘅新社會主義中國應該唔會再咁小氣喇啩?! 只要大狀們教定 d 仔女, 有咩唔對路就好似剛剛仙遊左嘅丞丞咁, 真心真意咁投入祖國嘅懷抱, 話唔定可以攞倒大棉花水蓋添. 希望 d 大狀繼續做夠薑一族, 幫我地呢 d 沉默的羔羊出吓聲囉.

另一類可以夠薑嘅人咪就係 d 小老闆囉, 好似揸沽兄呀, ck 兄呀嗰 d ... 起碼唔怕得罪 d 高層 / 老細. 見社會上有 d 咪野唔順眼嘅野都可以出吓聲啩.

嗰 d 冇家庭同物質負擔嘅後生仔, 可以夠薑走上個鐘樓度死 lur, 我都好羨慕佢地可以咁夠薑.

國際上, 夠薑以非暴力方式對抗權貴霸王國家嘅人少之又少, 有嘅通常都冇好下埸.... 經典人版 - 昂姍素姬姐姐囉, 俾人隊淋左嘅車臣人之母嗰個女記者啦, 遠 d 嘅有 "有個 dream" 嘅馬丁兄啦.

樓盤的命名學

最近行過何文田, 抬頭見倒有個新樓盤, 個名非常之咁型, 型在我唔識讀. 以我呢個土炮港男嘅中文水平, 我胆咁話八成嘅香港人都未必識讀個樓盤名. 呢個現象相當奇怪. 舊時要作名作商業用途, 第一個要求係要易上口, 容易記, 所以我地有人人百貨, 大大百貨, 長江, 雞仔咪. D 樓就仲直接, 總之一講就明, 一講就知响邊度, 經典之作有太古城, 沙田第一城, 美孚新村等等.

隨住九年免費教育, 我地知識水平高左, 大家唔再滿足於易上口易寫易記, 要開始有深度, 所以我地見倒d 同個地方或者個發展商無關嘅樓盤名, 例如海怡半島, 康怡, 嘉湖山莊等, 都係一D 有D 意境嘅名. 字唔太深, 但就冇咁直接, 好聽又有 CONTEXT.

97前後, D 發展商開始有d 技窮，開始玩嚟玩去都係嗰幾組字，什麼豪庭, 什麼半島, 什麼峯, 咩居物居, 咩軒物軒, 總之用呢幾組字 6 x 6 咁砌 d 樓盤名出嚟, 攪到 d 的士佬頭都大哂.

近呢兩三年仲攪野, 開始玩難字, 好深嘅字, 同埋玩唔識讀嘅字, 時代真係唔同左, 而家真係玩gimmick 玩到好盡. 首先講番何文田個樓盤, 可能你都見過 (應該未聽過啩, 有人識讀咩?) - 灝畋峰. 中間嗰個字我真係未見過, 唯有有邊讀邊 – “田” .. 呀, 今次冇錯喎, 真係讀個 “田” 字喎. 呢個其本上係一個動詞, 有以下嘅解釋:

1) 耕種。書經˙多方：今爾尚宅爾宅，畋爾田，爾曷不惠王熙天之命？孔穎達正義：治田謂之畋，猶捕魚謂之漁，今人以營田求食謂之畋食，即此畋。

2) 狩獵。如：畋獵。書經˙五子之歌：乃盤遊無度，畋于有洛之表，十旨弗反　。文選˙司馬相如˙子虛賦：楚使子虛使於齊，王悉發車騎與使者出畋。李　善˙注引司馬彪曰：畋，獵也。

(摘自教育部國語辭典網上版)

先唔好理佢個解釋, 我好唔明嘅係點解要改個冇人識讀嘅名呢? 無疑咁樣可能响開始時會多 d 人對你有好奇心, 可能會多 d 留意, 但係日後會唔會有d麻煩野, 例如的士大佬又唔知你講咩, 人地寫錯地址啦, 過十幾廿年後人地講錯個名啦 ..... 至於個解釋, 基本上都係想講話好多水嘅田咁解啦, 咁其實大鬼把淺d 嘅字可以表達呢個意思啫, 使唔使玩到咁盡呀. 你 hurt 左人地個中文自專心, 嚟睇樓唔識讀個名, 唔好意思問家嘛, 咁樣會唔會攪到人地一開始就對你個盤唔好印象呢?

至於近期玩得最過份嘅當然係嗰兩 “pat” 咩咩駅同埋物物駅. 根據網上嘅研究, 有冇呢個字都成問題, 個讀音就更加眾說紛紜. 最後個發展商求其夾硬講話係讀 “站”, 廣告都係咁講, 由佢啦, 但係日後住响果度 d 家長都唔知點樣解釋俾佢 d 仔女知好. 你話係咪玩出火呢?

就算識讀, 有 d 樓盤名根本都唔知佢 up 咩. 用 d 懶深嘅字, 我自問真係冇咁嘅中文造藝, 多數都只係知其音不知其意. 大家有興趣不如玩吓, 睇吓下面六個名, 唔使查字典或者問人的話可以解釋倒幾多個:

泓都, 尚翹峰, 珀麗灣, 岫雲, 溱橋, 尚堤

塡鴨式教育

呢個term基本上同香港教育制度劃上等號, 絕對係 negative 嘅形容詞. 其實大家有冇真係見過咩野叫做塡鴨架? 好似係法國最耍家, 一條管隊落去隻鴨個喉嚨度, 係咁灌 d 流質食物落隻鴨個肚度. 係呀, 好殘忍架.

香港嘅教育, 竟然俾一個咁negative, 咁殘忍嘅 term 嚟形容, 都好心"up"吓. 但今日睇倒 Business Week 嘅一篇報導, 即刻要再重新定位「塡鴨式」呢個 term. 個報導係講家陣南韓最潮嘅一種活動, 係叫做 cramming camp 或者 cramming class, 直譯叫做「塡鴨營」. 做咩? 咪就係 d 阿爸阿媽同 d 仔女一齊入 camp, 一鑊過係咁塞 d 考試野入個腦. 呢 d 仲未能勁, 有阿爸阿媽話一個月會用一半收入俾d仔女去 after-school cramming! 嘩, 你仲話塡鴨式教育唔好, 人地 d 仔女响學校俾人塡完再俾錢去塡多幾野至返屋企, 你地免費或者半資助就有得塡仲响度鬼殺咁嘈!

南韓最勁嗰間 cramming school 叫 Megastudy ... 真係mega 架, 年度收入 1 億 (美金呀!), profit 3 千7 百萬, 我地 d 英皇呀, A1呀唔入流啦!!! 不過人地有一大瓣野香港係做唔倒嘅, 就係 online course 喇. 人家南韓咁大, 點樣吓吓去首爾上堂呀, 就係咁, d courses 咪可以 mass production咁掟哂上網, 做一埸show就可以俾幾十萬用, 咪有 economy of scale 囉, margin 咪鬼死咁高囉. 其他野其實就同英皇冇咪唔同, 都係靠 d 明星老師, 同埋捉住 d 阿爸阿媽驚死個仔女冇書讀嘅心態.

其實家陣持續進修呢吓野响香港真係好揾錢. 加上政府有嗰 1 萬蚊補貼, d 所謂嘅學校真係發左茅咁開 course 呢趙你嗰一皮野. 但係 d course 嘅質素真係 .... 小心d 啦. 揾教育錢有幾容易? 前幾日先上完一個 course, 都已經係冇持續進修基金資助嗰隻, 千幾蚊一個course, 但係係咁倚就吸引左成幾百個人去上, 有幾難? 租個場, 揾個有少少名氣嘅 tutor, 做 d 宣傳啦, 攪掂囉. risk 咪頂籠個埸 d 訂金囉. 香港人真係好學!

所以話阿佛老爺真有遠見嘅大師, 佢一早就提倡教育市場化, d demand 咁大, 好嘅有口碑嘅 institutions 一定可以 survive 倒, 仲可以賺大錢添, 咁政府嘅資助又可以少d啦, 有困難嘅家庭咪發學卷囉. 唉, 大好一件事, 又俾d 有私心嘅既得利益者破壞左, 香港真係冇咩希望啦! 三流政客當道! 無知自私市民橫行!

又到聖誔, 又到聖誔

又到聖誔, 近幾年竟然習慣寄聖誔咭, 我都覺好奇怪, 家陣咩都 e, 寄聖誔咭呢家野好似好 out. 點解我會做 d 咁 out 嘅野呢??

其中一個原因可能係人大左, 有d 珍惜人與人之間嘅關係. 每年一次嘅寄聖誔咭, 其實係一次朋友 /人際關係嘅 stock take. 攞起咭片盒, 依, 呢個人成年冇揾過佢囉喎, send 張 e-card 俾佢, 問吓佢點先. 有一類人係平日根本就唔會contact, 一到聖誔我就會想寄一張咭俾佢, 當係提吓佢有我呢人存在, 我地曾經相識過. 我係極之信緣份嘅人, 有d朋友, 大家其實唔係認識得好深, 但就有一種想 keep 住嘅感覺. 好奇妙.

响渣估兄個blog曾經留過以下嘅睇法:

人生中, 90%嘅人會响你身邊擦過30秒倒,

5%嘅人只會响你腦海留有記憶

4%嘅人你會長時間地間斷見面, 可能可以好多好多年架, 如果你有呢d朋友, 都好安慰吓啦.. 兄弟姊妹都好可能係呢類.

只有1%嘅人係响你個人生中長時間經常出現 ... 邊個? 你阿媽囉, 老婆囉, 仔女囉 .. 有呢d人陪住先算係幸福呀.

每年我就會想寄聖誔咭俾第三種人, 呢d人大家真係識咗十年甚至廿年, 我覺得好有緣份至可以識咁耐架. 大家一年可能只會見三四次, 但係就係可以keep 住十年廿年. 喂, 大家諗吓, 一個人average 80 歲, 呢d 人就响你人生中佔有 1/8, 1/7, 甚至1/6, 1/5 嘅時間.... 值一張 2 蚊嘅咭啩!

當然仲要整幾張俾自己d staff.

e-card 唔得咩? ok ...... 但我地個腦已經為左適應 e 世代而發展出對 email 嘅抗藥性, 一係以9秒9 delete, 一係以極冇感情嘅眼睛望一眼再 delete. 你好有心咁一年contact 一次你認為重要嘅朋友, 總唔想得到如此下場啩? 你唔覺得有個 "friend" send 張 e-生日咭俾你, 你總係覺得冇咩野架咩?

朋友呢家野真係越嚟越難 define, 個個開口埋口話"我個 friend", "今晚約左d friend", "我有個friend xy x" ... 究竟係相識一場, 定係真朋友呢? 可以出來食飯並唔係一個好嘅介定, 不如好似我咁, 睇吓邊個你覺得會 send 張聖誔咭俾佢 (exclude 所有 business, 工作, face, 等等因素), 另外兩個我認為好好嘅介定係:

1) 你結緍時你好想佢嚟飲嘅... 唔包括嗰d 一group 人夾硬請埋嗰 d

2) 你死左之後, 你覺得會為你喊得好慘嗰d朋友, 我成日都會用呢個 rule 去assess吓身邊嘅"朋友".... 變態!

..... 聖誔快樂

攬住一齊死

政府又縮沙, 唔推gst, 我等小中產兼夾心人只好低泣啦. 稅基永不擴闊, 永遠都向小部份人攞錢, 又要綜援, 又要俾大陸老婆生仔, 過十年八載人口老化, 又話唔夠錢提供足夠嘅基本醫療服務啦, 到時又冇錢又有病, 睇你班友仔今日反對 gst, 買多d 無謂野啦 . 老左之後個政府又破 q 左產就大家攬住一齊死啦.

之前聽過一d 無厘頭嘅所謂中產聲音仲離譜, 話希望可以減紅酒稅幫輕吓佢地, 喂, 咁重負担飲水啦, 飲咩野紅酒啫. 連呢d無謂野都唔俾政府抽多d稅, 加你薪俸稅好唔好?

希望日後如果 gst 再有機會攞出嚟再討論時, 大家真係要好好考慮一吓個 fundamental issue, 即係個稅基嘅問題, 我認為中學所學嘅一條 physic 定理好值得我地去深思, 就係 conservation of energy, 熱能係唔會增加或者減少, 用中國人嘅成語應該叫做此消彼長, 公共開支同公共資源基本上係一個零和遊戲. 呢度收少左, 一係响第度收番多d, 一係咪政府使少d囉. 最好當然係揾倒一個方法公平d, 張呢個公共開支嘅 burden spread 得開 d 同 efficient d. 呢樣又唔俾收, 果樣又話要減, energy係唔會 created by itself 嘅, 兩位前財爺只不過係將呢個concept 演繹得比較layman d -> 錢從何來呢?

你俾過錢Google未?

今日睇開d電腦雜誌, 見倒介紹 Google 一堆新嘅服務, 突然間諗吓點解一間公司可以有咁多錢去開發d咁勁嘅 software 同 services , 而我地又可以唔使俾錢就有得用呢?

呢個世界真係變得好奇怪. 以前做生意, 咩都講錢, first priority 係諗計仔出d野賣錢, 依家d網上公司嘅 first priority 係整 d free 野出嚟, 再去諗點用 d free 野撘住揾錢. 佢地主要嘅收入係廣告, 賣廣告嘅人就諗住向用 呢 d free service 嘅人賺錢, 嗱, 係要响你身上賺番好多錢, 要多過佢落廣告加埋佢自己嘅 profit margin 喎…

通常去到呢個位, 我都會想起兩位財爺嘅金句: 錢從何來? 大家諗吓, 自己响網上面使左幾多錢呀? 我自己最常用嘅就係網上訂花, 冇錯, 係一年兩至三次咁大把囉, 又可能會訂酒店, 買機票, 但呢 d 野同 Google, Yahoo 一d 關係都冇喎, 我用左咁多年 hotmail, 從來一蚊都冇益過 Microsoft 喎, 你有冇呀? 你覺得嚟跟幾年你會唔會花錢俾 Google, 或者花錢俾响Google 上面嘅廣告商呀?

當然, 係有好多 dot com 個 business model 係好 solid 嘅. 例如 Jobsdb 呢類, 喂, 收錢至可以買個位, 而俾錢嘅 HR Dept 係有實際得益同用途. 又例如近年好流行嘅網上交友, 好鬼多人真係真金白銀俾錢 yahoo 走去溝女架, 又好似 d 網上賭場, 真係有錢賺架…正氣d嘅 Amazon 都 ok, 另一種可能唔係好多人知嘅係d網上相薄 (e.g. fotop.net), 佢地有好多paid customers 架, d 影相發燒友係唔介意一年使百零二百零蚊, 換取一個冇廣告嘅相薄, 一個百零蚊, 幾百個客就唔野小啦, 但係好似 Google 呢種純portal … 我真係唔知錢從何來, 可能係我地呢隻 end consumers 靜靜雞俾 Google 賺左好多錢都唔定. 如果你有頭緒的話請指教一吓小弟, 好等我明白吓點解 Google 可以長升長有, market cap 仲大過 GM!

Webb哥的高見

今日Webb哥俾左佢嘅一年一度推介, 放工睇吓個 graph, 吓, 升左37 個? 最高升過 40 個? 有冇咁誇呀? 隻股有冇 undervalue 成40個呀 … 算啦, 唯有同自己講吃不到的提子啦. 再走去睇吓Webb 哥個 site, 佢中間嗰段分析後市唔知有冇人睇, 我就覺得好有教育意義喇.

依家個勢, 令我完全想番起兩年前嗰個年尾嘅慘痛經歷, 完全係差唔多, 當年年尾又係勁多ipo, 隻隻都賺, 又係只要同科技有d關係, 加d大陸 feel, 個個都覺唔抽正傻仔, 冇錯, 我都係其中一隻傻仔, 水尾走去抽隻中芯, 當時嘅賣點係:

1) 晶片喎, 科技野喎
2) 中國第一隻喎, 又係最大嗰隻晶片野喎, 點會死呀
3) 唔知係全球第幾喎, 台積電都好似同佢差不多喎
4) 好似有 d 大孖沙都話抽喎

係咪好似呢, 結果係點相信唔使多講, 上市到依家仲係成條死屍咁, profit margin 低, capital expense 年年升, 晶片 demand 前兩年全死, 所以都係嗰兩個原則囉:

大圍好, 股可以好, 未必隻隻好, 要睇business 嘅 fundamental, 大圍死, 大多數都死, 理得你 fundamental有幾好.

依家你信唔信美國個市會唔會死就好大分別喇, 如果你睇好, 咁都要遵守第二條 rule 呀…. Fundamental 囉 … 我就冇咁睇好喇, 其實家陣放錢响銀行都唔錯呀... risk free 都有成4厘回報, 冇risk 喎, 頂多咪輸 d exchange rate risk... 唔使煩就賺 4 厘, 對於我呢 d 怕死鬼嚟講已經好好喇!!!

乾收銀 實例

上一次咪講到D乾收銀係點樣 用 XXX ESTIMATE 去 JUSTIFY 一 D 無厘頭嘅預測, 其中一個有良心D 嘅方法咪係整D咩野STUDY 呢.. 嗱, 唔係我老作, 噚日嘅 BUSINESS WEEK 其中一篇報導就係咁寫喇：

“A recent Boston Consulting Group study found that 85% of executives expect a big rise in the number of unleashed workers over the next five years.”

你估吓究竟係一個真正嘅 GLOBAL STUDY 去 BORROW 人地D WATCHES, 定係叫個名牌 U 嘅ASSOCIATE 仔去做個靠估 STUDY 呢??

其實都唔係好緊要, 反正個所謂嘅FINDING 同 “A recent XYZ study found that 99% mothers are female” 冇咩分別 ..!

今星期嘅焦點

今個星期有兩樣野要睇住睇住, 一就係台灣兩市選舉, 一就係多隻新股上市.

先講新股, 我要睇嘅並唔係要抽邊隻, 而係睇吓我公司 d 姐姐仔有冇喺度高談闊論d新股. 上一次我聽倒佢地响度討論股票時, 過兩日個市就跌左近600點, 唔係話佢地係股市毒藥, 而係我唔記得左邊位大師講過, 連街邊阿毛都講 number 嗰時, 個市就應該到尾聲喇. 阿毛只不過係一個統稱, 泛指一d平時唔多留意個市, 但當個市升到”把把聲”嗰時就會大好投入咁討論number 嘅人, 連呢d人都想入市之時, 即係 bigger fool 已經出現喇, 你再跟佢地入市就真係the biggest fool 啦. 今個星期開始接受申請d新股我都唔係好知係做d咩鬼野, 如果咁都可以令到d姐姐仔們話瞓身抽股的話,我睇我都係揸番cash 好喇.

另一樣我有興趣要睇住嘅就係台灣選舉. 可能你一直覺得台灣d選舉係鬧劇, 但係我就覺得係我等返office 工之人最佳嘅 office politics 同埋心戰速成班. 佢地嗰種勾心鬥角, 外弛內張, 表面敵人, 內裏合作嘅各種花招, 絶對係目不暇給, 如果唔學d衰野, 當電視長劇咁睇, 好睇過苗穚偉呀! 但係睇之前要做d功課, 先至會睇得過癮. 咩野功課? 咪就係各路人馬嘅恩怨情仇囉, 你要知道邊個唔妥邊個.. 呢d咪又係同返工一樣囉 .

靜係噚日嗰單「馬宋會」已經好野啦, 馬仔出哂成隊人去幫肥仔斌, 以為佢係真心撐硬呢件藍營代表. 點知佢响選前一星期玩小動作, 走去密會宋仔,俾人覺得佢可能暗地裏幫宋仔爆冷, 好等宋仔兩年後力撐佢做總統. 但係我估佢冇咁大胆自己行呢一步, 好可能係藍營內有人覺得肥仔斌真係唔係好掂, 不如推宋仔上, 咁樣起碼兩年後藍人入返總統府嘅機會大d. 但如果唔係藍營有高人指點, 馬仔最後唔玩「棄斌保宋」的話, 咁搞最大得益者反而係廷廷, 因為泛藍選民根本唔知投俾邊個好, 宋仔會分薄哂肥仔斌d票, 咁廷廷又可以再一次嚟一野藍人內爭, 漁人得利 … 但如果廷廷選上, 馬仔有咩好處呢? 馬仔心想d咩? 有興趣咪留意留意吓啦.

Tiffany

講左幾日乾收銀, 要歇一歇, 今日講吓女人野.

香港甚至係世界上好多男人都曾經俾Tiffany鋸過, 如果你今年剛剛俾佢地鋸過, 就更加大把人陪, 因為佢地剛剛公布左第三季業績, profit 比上年好左成22%, 如果你下次要被迫買Tiffany俾你個愛人, 不如試吓同時間買一手佢D 股票對沖吓, 話唔定可以賺番隻介指返嚟.

Tiffany 最好生意嘅地方, 竟然係美國市埸, 証明好多人估美國個市就快死未必會短期實現, 大家想想, Tiffany 呢 D 野真係冇閒錢都唔會買啦, 美國地區竟然可以有 23% increase in sales 喎, 睇嚟班負債累累嘅美國佬仲係非常之咁樂觀, 繼續買野. 反觀好多人話已經經濟好番好多嘅日本, tiffany d 銷量竟然下滑左成8% , 究竟係d 日本人唔再鐘意 tiffany, 一話佢地冇錢(or 冇信心) 買呢d 無謂野, 我就唔知喇. 至於美國個市, 我睇關鍵在於佢地d樓市喇, 以新屋量同埋新 mortgage d 數嚟睇, 就真係好鬼危, 但係d 就業指數同埋個消費信心又真係好到不得了, 呢d咁嘅五五波我就真係唔識comment 喇，（其實就算係７３波，８２波我都唔係好識睇，通常係完埸後我至會醒覺！）我就比較睇重就業數據喇，Ｄ人一冇野做（或者覺得份工唔多穩），就冇錢供樓（或者唔想供樓），更冇錢買Tiffany啦。

Tiffany呢期真係好紅, 佢嗰隻幾十粒嘅六爪鑽介俾阿扁嫂炒到火熱, 再加一個100年來最最面皮厚同埋狡猾嘅「總統」, 佢嗰野一日講6個唔同嘅大話兼且互相茅盾, 真係比隻鑽介更加耀眼。綜合我上面嘅意見, 相信阿扁唔使睇我呢個 blog, 都識得用阿公d錢去買隻六爪之餘再用幾百粒阿公錢買左幾十手 tiffany. 家陣實賺哂啦.

點解tiffany咁受女人喜愛呢? 曆史係一個因素, 18xx年就開鋪囉喎, branding strategy 更加功不可抺, 一個brand 可以做到永不discount, 你話勁唔勁. 佢地嗰招以淺藍色做 corporate color, 我就好buy la, 其實作為男人, 我都幾鐘意買tiffany , 因為人地花左咁多錢去build 個brand. 你就以可以用幾舊水頂多千零買隻最plain嘅 (但又好鬼高貴喎) 介指, 攞住個淺藍色一望就知係 tiffany嘅盒, 送俾你個愛人, 喂, 好過買個成萬蚊嘅 brother 或者菇遲啦, 花左成皮野仲要俾人估係 A 定B. 好hurt 架.

乾收銀的價值

你睇完兩篇乾收銀文章, 可能會以為我唔鐘意 D 乾收銀, 其實唔係, 大家都係揾食啫. 我通常都會好鬼配合佢地。冇話鐘唔鐘意 ... 做完野有緣嘅咪 keep 住contact 囉, otherwise 大家拜拜都唔好再見架啦, 使咩野唔鐘意呀, 最緊要嘅係佢可能一個唔該做埋你同事 (or worse 你老闆), 咁就大家一家人囉 :)

第二個問題你可能會問: 咁究竟佢地有咩野存在價值呀? 點解佢地可以收咁貴, D 人又咁富貴呀? 咁首先大家要明白乾收銀通常係咩野人請同埋功用何在. 第一個問題非常易答: 咪通常係D 老闆囉, 仲要係非常高層嗰隻, 有左呢個答案, 咁一切嘅迷底已經解開, 就功用而言, 我會估有以下幾點

(哦, 寫吓 disclaimer 先: 所有野我响度寫嘅都係靠估, 千萬唔好當真, 如果真有其事都只係純屬巧合):

1) Empire Building

你响一間大公司做高層, 又突然間好想有一番作為, 想起一檀野 under 自己攪吓, 但係點先可以 convince 倒其他高層俾自己攪先? 乾收銀當然可以幫倒手啦, 點樣攞倒 budget 請佢地就要睇吓個高層嘅功力啦, 如果請倒的話你已經掂左八成喇. 班乾收銀一定會發揮佢地嘅小宇宙, 幫你做個靚到冇人有嘅 powerpoint 嚟做report, 同埋一大堆超 positive 嘅 graphs, 去幫你 justify 你個新 idea. 拿, 呢處有兩個 key points:

a) 一定要請 d 超貴嘅乾收銀, 因為只有夠貴, 其他高層先至唔夠胆話做完個 study phase 之後就話唔攪, 因為都已經使左成幾百萬或者成千萬, 點可以話唔攪先, 但如果貪平用百零萬甚至幾十萬, 其他人會話: ok, study 完啦, 唔係好大potential 啫 .. 所一定要夠貴.

b) 小心昅實幫你做野嗰班乾收銀, 尤其係個 Project Director, 因為佢嘅 first priority 笨唔係幫你做好個 project, 而係把握任何一個機會睇吓有冇其他 project 可以做, 如果你以為請左佢返嚟就咩都唔使理的話, 好快你會發現你隔離房個死敵下星期有個大你3倍嘅 project 做 kick-off!

2) 唔識做 or 唔想做

你有個大project, 自己真係唔係好識喇, 又唔係好想花好多心血, 唔做又唔得, 你就可以响 做project 張 business case paper 時預 d budget 去請 乾收銀幫你手, 今次個 key point 就唔係錢喇, 最緊要揾個好有經驗同有責任心嘅 project manager. 唔使太貴嘅, 因為通常呢種 project 都唔會係 d 好難嘅野, 只係好煩同埋要好tedious , 只要請隊細心肯做嘅就得喇. 有咩野例子? Basel 囉, SOX囉, IT Compliance囉.

…… 待續

乾收銀 (二)

其實乾收銀最強嘅, 笨唔係 borrow your watch and tell you the time. 佢地最能發揮小宇宙嘅時候係你同佢都冇watch 嗰時, 佢地就真係殺哂. E.g. 當年Tom.com 連阿毛都去排隊買, 誠誠係咁bid 3豬嗰時, 大家都話要攪 e-business 同埋鬥吹 3豬有幾勁. 幾多乾收銀彈出嚟 pitch d 大客, 係咁狂吹 hit rate la, content la, application la, APRU la, 吹到班大企業高層如痴如醉, 事實証明呢幾年根本就冇人知點攪 3 豬, 你睇吓到7年後嘅今日我定仲係主要用梗2.5豬, 當年e-business 真係知點攪嘅亦少之又少, 真係知嗰班都已經發左啦, 你估google, youtube, jobsdb.com佢地d人邊個唔係邊做邊學, 慢慢摸出條血路, 有冇請過班乾收銀吹水呀?

但係就係呢種情況, 班乾收銀嘅功力先可以發揮得淋漓盡致, 大家都唔知未來係點, 即係大家都冇watch, 佢地就係有本事吹到似層層, 好似係真咁, 反正事後得唔得佢都已經收左錢, 亦冇話包生仔, 我同你打賭, 依家有3豬牌嗰幾間電訊公司, 都曾經請過班貴貴乾收銀做過吓projects! 吹過吓 3 豬 點攪.

點解佢地咁利害? 拿, 我自己精神分裂咁度左一兩招, 大家share 吓睇吓work 唔work. 首先, 响龍頭嗰間公司headhunt 一件有地位有白髮嘅高層過檔, 既可靠佢嘅connection pitch 其他公司, 又可以好cost effective 咁一野收買左佢响龍頭公司嘅 experience, 話哂係龍頭, 實係比其他公司早少少攪過吓 d 前衛野 (如 3豬), 係咁就可以sell d 未攪過嘅客話我地係 specialized in xyz … 記住用 "specialized in" 呀. 跟住就响個公司個 intranet 上揾一件 Phd 級數(真係要博士級架)嘅人, 加一個做過好多projects 嘅 project manager, 加一兩件 LV, Gucci 級嘅 fresh grad (即係要哈記, 劍記, 牛記啦, 中大科大就唔係唔得….但要有 8 –10 A, 或者發明過火箭咁啦), 攪到成隊皇馬咁, 拿, 最後要同個客講: d 新野幾咁勁, 幾咁有 potential, 有一招好好使:

1) 首先做張好靚嘅 powerpoint,
2) show 一個向右上角勁升嘅curve,
3) 寫住 compound growth rate 係30%,
4) 註腳寫住Source: McXXXcy Estimate

拿, 唔好攪錯次序呀, 首先係張好靚嘅 powerpoint, 通常個客已經好 impressed, 又可以令叫你嚟present 嗰位人兄有哂 face. 再加嗰個好浮誇嘅 curve, 呢個時候 d 客已經好少會理係幾多 %, 靜係會覺得真係好有 potential 呀.. .. 呢個graph 非常好用, 你可以用做 no. of customer 又得, profit 又得, revenue, 又得, 隨你喜歡.

你會問: 依, 咁樣點計30% 呀? 重要咩? 個graph 通常係講緊 10年或者30年後嘅事, 到時有冇人會 challenge 你先, 點計? 個註腳咪講明左囉: internal estimate 囉, 有良心有本錢嘅做法係全球(或者起碼都地區性) 同 d 有關行業嘅公司做個 survey, interview吓D高層問佢地點睇 (呢, borrow your watch and tell you the time 呀), 攞個 average 數咪係你嘅 estimate囉. Efficient d 嘅就 send 隻 email 俾件fresh grad associate, 叫佢做個 research, 俾個答案, d 醒目仔醒目女會好快咁亂作個 figure 出嚟, 但係又識講到似層層咁架啦. 但係呢一招唔係間間乾收銀都可以用, 只有嗰 d 名牌中嘅名牌先可以有說服力架, 喂, 你唔好係間土產 GOOD FORTUNE MANAGEMENT CONSULTING, 又走去用話係 Good Fortune Estimate 呀.. 有鬼人睬你咩… 點算? 抄人咪得囉, 加個 “from”字咪得囉 => from McXXXcy Estimate.
…. 待續

乾收銀

呢期有幾個乾收銀(consultant)走嚟我公司話要做個 project, 主要係睇吓 x 呢樣野响香港有冇得做. 我覺得前人創作出「乾收銀」呢個中文term 嚟代表 consultant 真係妙絶, 佢地真係有少少嚟斎收錢的意味. 另外一個精妙嘅講法係 they borrow your watch and tell you the time. 依我個人經驗呢個講法真係為120%準確. 好似我呢單野, 基本上嗰幾件 consultants 連個business 係賣咩野都未攪清楚, 但冇所謂喎, 佢會咁問你:

1) 你覺得點解 x 响香港唔流行? (我：d 客對呢隻野冇咩need 喎 ... market 唔係好大喎)

2) 你估我地可唔可以target 一d 特定嘅客戶 for 呢個 x 呢 … (咁實得格, 咩野都實有d 人買格 …)

3) 依 … 咁你覺得如果我地加入 a, b, c 元素, 又假設 price 不變, 你覺得 x 有冇market 呢? (加埋a, b, c, 仲要個price 不變, 咁即係無敵啦, 實有market 啦, 但係有咩可能做倒個 price 不變呀 …做倒我一早做左啦)

4) 唔 …. 我地都係假設啫… 我主要係 explore 一吓 x 嘅 market potential, 我定當然會同其他 key parties 再 discuss 吓 ….

5) 最後… 唔知你可唔可以 provide 倒呢d, 呢d, 呢d, 呢d, 同嗰d data 同 analysis 俾我地呢, 會對個 project 好有用 (嘩, 要咁 detailed 呀, regular reports 冇喎, 要特別揾IT d 同事做喎 … 幾時要呀 …)

就係咁, 一班咩都唔知嘅乾收銀, 响你口中得到左佢想要嘅答案, 又輕易地攞倒極唔輕易得到嘅data, 返去整幾張超靚嘅 powerpoint, 佢就會同老細 present：初步睇 x 响香港係有market 嘅, 但係我定要進一步好小心地revamp 過隻product, 增加佢嘅attractiveness. 就係咁, 老細滿意, 班友仔又可以趙多個 project 繼續睇吓點 revamp 隻 product, 叻仔d 嗰 d 仲可以冧掂個老細, 開一個部門俾佢落腳, 大攪隻無敵 x !

…. 待續

電型的閙劇

電型單野真係好正, 如果我有誠誠嘅 email, 我一定會send隻貓俾佢老人家, 唔該佢成家人唔好好似香港佢地玩哂咁! 你地父子玩野唔該返屋企啦…

我估都唔係好多香港人好喜歡楷楷, 因為大家都輸左好多錢响 8 號仔身上。 投資輸錢其實唔應該賴人, 但係件楷楷當年扮哂IT俊傑咁, 點知買左電型咁多年一無是處, 只係識勁炒人, 賣吓資產, 股價低無可低, 靠"著數" 攪番似樣d , 有d 息派吓, 就以為自己好似修成正果咁款, 想光榮引退, 點知冇d political 聲屎, 激親老爺大人仲死撐, 最後要老豆揾個家臣出嚟解圍 , 點知楷楷極度面懞, 發老脾唔賣, 你話d 小股東點面對佢兩父子呀..

其實平心而論, 件楷楷可說係有d料到 (雖然八卦雜誌係話佢身邊 d 軍師勁, 唔係佢), 靜係死都唔睇佢老豆台戲已經夠堅啦, 但係問題係佢從來冇露兩手攪好間公司 (賣星星電視賺倒錢唔算係識攪公司啩), 為小股東賺番 d 錢 ….依家想鬆人都攪到一鑊泡 …

佢老豆又係攪笑, 以為有錢大哂, 點知將 d 父子情仇揚哂出嚟, 唉! 我呢 d 一早心死嘅小股民, 基本上賣唔賣都唔關我事, 不過就好amazed 而家廿一世紀, 都仲有呢 d 7/80年代嘅豪門恩怨現實版, 無線下年嗰套60集回歸戲真係可以加入呢段 … 待續

經濟發展的剝削

據世界銀行(World Bank)的初步分析﹐中國家庭中最貧困的10%人口（約1.3億人） 2003年的平均收入比2001年降低了2.5%。中文華爾街日報說成：「中國最貧困的人群正在滑向更深的貧窮深淵。」這使我想起個多月前所看的一個電視節目 (應該是星期日檔案), 內容是講述中國農村的貧困境況, 有父親因兒子考上大學而自殺, 有老農民因頑疾而想與老伴一起了結一生。從電視營光幕你能深深地感受到他們的絶望。中國農民近年的自殺率已到達可怕的地步。

我常認為中國地大脈博，中國人的性格又十分堅強, 所以無論多貧窮也不會太絶望，天生天養, 只要有一片土地, 做點耕作, 總能養活自己。他們的絶望不是全因為貧窮或生病，而是在貧窮和生病的同時要承受貪污的折磨。每年才賺得數百元人民幣, 卻要繳交各式各樣的稅項和收費, 政府又沒有因為他們的繳稅而提供基本的保障, 還會把地徵用, 令他們失去最後賴以為生的工具 (但稅項依舊)。層層的剝削者把從農民身上取得的金錢變成地方政府的投資或其個人的消費，從而轉變成 GDP的増長。先讓一部份人富起來是做到了, 但小平老爺想不到的是那批助他起家的農民到頭來變成為了更慘的一群。

看完這篇報導, 令我想起日前剛公報業績的領滙, 成績亮麗, 派息増加, 一眾基金持有者當然開心。業績增長的來源不外乎是加租, 領滙管理的都是公共屋村的商場和停車場, 領滙加租, 小商戶便得把成本轉嫁給消費者, 而這些消費者當然是那批比較沒有太高收入的公屋住戶。領滙是賺多了, 但不見得房委會會因此而可以減少政府預算, 從而使納稅人減少交稅。整件事上的利益是來自下層, 得益的卻是小部份的基金持有人。當然我們希望見到的是房委會增加了收入, 會把錢花在令公屋住戶居住環境改善的事情上, 但這只是主觀願望, 就像中國的農民交了各種的稅項和徵費, 都會希望政府有一定的照顧, 但事與願違, 只歎奈何。

我對社會主義沒有太深的理解, 但相信離不開低下階層(應該是指無產的一班吧)為了抵抗上層剝削者的欺壓, 憤而把所有財產公有化再大家平均分配。雖然現在資本主義當道, 但低下階層被剝削的情況其實仍然普遍。想不到的是這股原本為社會主義最強的動力, 卻在世界上最大的社會主義國家漸漸消退, 消退得令他們生存的動力也被磿滅。

為何寫這 BLOG

上星期閱讀AM730, 發現該報邀請了BLOG界兩位明人開始連載文章, 連同我十分喜歡的CENTRALBLOGGER, AM730已有三位BLOG界猛人加盟, 我開始對BLOG 這東西有點興趣, 上網看看, 啊, 原來已有很多猛人開BLOG, 而比較受歡迎的BLOG 大都是與財金分析有關, 他們的見解獨到, 分析有理精闢, 加上一些真實生活的體會, 令我看得津津有味, 心中泛起一償開BLOG滋味的念頭, 奈何本人是個投資白痴, 買股EQ極低, 絕不能談號碼, 寫分析, 唯有來一點生活的話題, 希望提供一些另類的BLOG, 和大家分享和討論, 可能悶了一點, 請大家指教指教。

近年的奇怪廣東話口頭禪

我發現近年香港流行一些奇怪的口頭禪, 指的並不是八婆雜誌創作出來的那些 ﹝如啜爆！﹞，而是普遍性地流行於某些人或行業，不知從那時起人人都是這樣說，十分奇怪，現在列舉一些例子讓大家討論討論：

我首選「番」字。「番」本身有 order in series 的意思，用於廣東話時有「再次」的意味。這個字最流行於銷售行業 (如地產經紀及電訊推銷員) 及財金推銷員 (我不會說他們是財金分析員)。最常見的用法是：a)「先生，介紹番個最新嘅優惠比你 ……」b)「小姐，睇番個市，應該會去番5,000蚊嘅水位」c) 「今日申請俾番個優惠你…」d) 「個市有機會突破歷史高位, 去番19,000點嗰 d 水位」

a) 至c) 你一定會聽過。我每天回家，都會聽到中X的地產經紀向我說這些話，我的反應是：介紹番? 我識你架咩，你之前有介紹過俾我咩；睇番個樓市還可以, 因為佢可能真的一直在睇, 所以見倒我就話睇番, 但係個樓盤從來都未去過5,000蚊, 點去番呢？咩個優惠原本係我嘅咩, 點解要俾番我? d) 通常會在財經節目聽到, 既然是歷史高位, 即是從來未達到, 為何又說去番呢? 不知什麼時候他們一起用了這個「番」字, 便不離不棄, 什麼情況什麼條件下都說「番」, 正式成為他們的口頭禪。

第二個想和大家分享的是「有咩野幫倒你」(註：當然是配撘上「介紹番個 X 俾你」)，常見於如電器店內的售貨員。相信是因為「埋嚟睇埋嚟揀」比較老調，所以發展出這新版的叫賣語句。兩代的叫賣法同樣地並不發自內心, 只為製造熱鬧氣氛， 如你真的有事請教， 他們多以懷疑的眼光回應，並以十分簡短及冷談的語句終結。一半以上機會他/她是不能幫你的。而另一半機會則是你根本不想幫忙, 只是想看看最新型號或款式，但售貨員還是努力不懈地在你身邊不斷地說「有咩野幫倒你」「有咩野幫倒你」「介紹番個 X 俾你」… 直到你不好意思再看為止 (通常30秒內)。這口頭禪在驅趕客人方面功效顯著，以創意來說卻遠遠不及鴨記的街頭創作。

第三個是「意向價」，這不全然是口語的廣東話, 在很多文字媒體上也會看到, 如地產版最常見某某樓盤的意向呎價為10,000蚊, 或某新股的意向價介乎HK$1.5至HK$4.3。兩者雖然用法一樣, 但實際上卻是天壤之別, 原因是前者多是作大, 從來真實開價都是少於這個所謂意向價，想營造的效果是開價十分相宜, 有買趁手。後者卻剛剛相反, 很少會看到上市價不是在這個意向價範圍內, 而且大部份都是以上限訂價，可謂意向十分明顯。這個奇怪的「意向價」便成為業內人士的口頭禪了。但如細心一想, 在一買一賣的過程中, 除非買賣雙方有意就價錢作出相議，才有可能出現多於一個價格。在新盤銷售及新股上市的過程中, 一般小散戶根本沒有議價能力, 只有買和不買的選擇，所以對他們來說根沒有什麼所謂意向價, 只有一個叫買價的東西。業內人士串同媒體合力創作出這個口頭禪叵心可測，相信我眾港男並不會落入這無聊的圈套。話說回來, 如把這個「意向價」翻譯成英文, 相信應該叫作 Expected Price. 這令我聯想起 resume 上常見的 Expected Salary, 可能有一天我會收到一封 resume 上寫著 他 / 她的意向價是 Negotiable!

你們有其他更奇怪但 common 的香港口頭禪嗎? 歡迎和大家分享。